Di loondäi önj Kil as et parlamänt foont lönj Schlaswik-Holstiinj. Di jarste demokraatisch kiisede loondäi trätj 1947 tuhuupe. Da loondäismååns än loondäiswüste kiise di ministerpräsidänt än beslite da ruchte, wat önjt lönj jüle schan. Tu tids regiird en koalitsjoon üt e CDU än da Liberale (FDP). Jü christdemokraat Peter Harry Carstensen as ministerpräsidänt foont lönj Schlaswik-Holstiinj.
Di Söödschlaswiksche Wäälerferbånd (SSW) as, oufsänj foon en kort perioode önj da füftier iirnge, sunt 1947 önj e loondäi önj Kil präsänt. Üt histoorische grüne koon följk di SSW bloots önj e loonsdiilj Schlaswik kiise. Da biise manerhäide, wat jam döör e SSW fertreese lätje - da dånsche än da nordfrasche - laawe bloots önj dideere loonsdiilj. Önj Holstiinj wårde deerfor niinj kandidoote bai loondäiswoole döör e SSW apstald. Jü "Boon-Kuupenhuuwen-Deklaratsjoon" heet deertu fjard, dåt di SSW bai da loondäiswoole foon e 5%-klausel friseet wörd. Ouers di SSW schal tut manst sü maning stime füünj, as eefter en was rääkenwis nüsi san, for än fou en mandaat.
